Nic qəsəbəsinin müqəddəs Yelisey kilsəsində Liturgiya və humanitar-maarifləndirici aksiya keçirilib

Artıq ikinci ildir ki, Alban-udi xristian icmasında liturgik həyat davam edir. Alban-Udi xristian icması ilə Bakı və Azərbaycan yeparxiyası arasında razılığa əsasən Azərbaycanın Qəbələ rayonu Nic qəsəbəsinin qədim kilsələrində hər il İlahi Liturgiya keçirilir. Bakı yeparxiyasının ruhaniləri pravoslav udilərlə birlikdə "Cotari" mqd. Yelisey və "Bulun" Allahın Əqdəs Validəsi kilsəsində ibadətlər keçirir. Liturgiya zamanı dualar və ilahilər həm kilsə-slavyancasında, həm də udi dilində səslənir.

Sentyabrın 2-i, şənbə günü, mqd. Yelisey kilsəsində keçirilən Liturgiyaya Bakı yeparxiyasının katibi arximandrit Aleksiy (Nikonorov) başçılıq edib. İbadətdə Alban-Udi Xristian İcmasının sədri Robert Mobili, icmanın dini rəhbəri Rafiq (Rafael) Danakari, Nic sakinləri və Bakıdan gələn zəvvarlar iştirak ediblər. İlahiləri Mixail Klimovun rəhbərliyi altında mqd. Mürr-Daşıyan Zənənlər kafedral kilsəsinin kiçik xoru ifa edib.

Liturgiyanın sonunda kilsənin həyətində orta məktəbdə təhsilə başlayan 50-yə yaxın uşağın iştirak etdiyi “Uşağı məktəbə hazırla” humanitar-maarifləndirici aksiya keçirilib.

Artıq Azərbaycanın bir çox şəhər və kəndlərində ənənəvi hal almış tədbiri Rossotrudniçestvo (Bakıdakı Rus Evi) nümayəndəliyi və VTB-Azərbaycan Bankı təşkil edib. Kampaniya nəticəsində 50 nəfər birinci sinif şagirdi məktəb ləvazimatları ilə bel çantaları alıb.

İbadət və xeyriyyə tədbiri zamanı CBC teleşirkəti tərəfindən “Tolerantlığın çalarları” silsiləsindən olan növbəti verilişinin çəkilişləri aparılıb.