Gəncə şəhərində kilsə bayramı keçirilib

Pentekost (Əllinci Gün) bayramından sonra 14-cü Rəbb Günündə Gəncə şəhəri Aleksandr Nevskiy kilsəsində taxt-tac bayramı keçirilib. Gəncə kilsəsinin əsası 1884-cü ildə qoyulmuşdur və kilsə ilk olaraq kafedral kimi tikilmişdir. Təxminən əsr yarım ərzində bu kilsə ölkənin qərb bölgəsində yaşayan pravoslav xristianlar üçün cəlbedici dini mərkəz olmaqla yanaşı, həm də Azərbaycanın bir çox görkəmli övladlarının vətəni olan qədim Gəncə şəhərini bəzəyən memarlıq incisi olub.

Rəbb Günü ərəfəsində gecə duasına, eləcə də Rəbb Günü İlahi Liturgiyaya və xaç yürüşünə yeparxiya ruhanilərinin müşaiyətilə Bakı yeparxiyasının katibi Arximandrit Aleksiy (Nikonorov) başçılıq edib. İlahilər Mixail Klimovun rəhbərliyi altında Bakı kafedral kilsəsinin kvarteti tərəfindən ifa olunub. Yeparxiyanın zəvvarlıq idarəsi Bakı və Sumqayıt kilsələrinin imanlıları üçün Gəncəyə bayram münasibətilə səfər təşkil edib. İbadətin sonunda arximandrit Aleksiy kilsənin baş keşişini, kilsə icmasını və bütün ibadət edənləri bayram münasibətilə təbrik etdi və bayramdan xatirə kimi zəvvarların adından kilsənin baş keşişi Varfolomey Sotnikova yeni keşiş libasını hədiyyə etdi.

İbadətdə şəhər rəhbərliyinin və KİV-nin nümayəndələri iştirak ediblər. Həmin gün AzTV dövlət kanalının regional xəbərlər bölümündə Gəncədə pravoslav bayramı ilə bağlı reportaj nümayiş etdirilib.