Milli Birlik Gününün qeyd edilməsi çərçivəsində “Metelitsa” Dövlət Rus Xalq Çalğı Alətləri Orkestrinin konserti keçirilib

Rusiyanın dövlət bayramı — Milli Birlik Gününün qeyd edilməsi çərçivəsində S.Vurğun adına Azərbaycan Dövlət Rus Dram Teatrının səhnəsində Rusiya Federasiyasının əməkdar artisti İqor Toninin rəhbərliyi altında “Metelitsa” Dövlət Rus Xalq Çalğı Alətləri Orkestrinin “Ürəkdən ürəyə” adlı konserti keçirilib.

Bayram konserti proqramı S.Vurğun adına Azərbaycan Dövlət Rus Dram Teatrının təşkilatçı dəstəyi və Rusiyanın Azərbaycandakı səfirliyinin köməyi ilə Leninqrad vilayəti Mədəniyyət və Turizm Komitəsi, Bakı Rus Evi və Azərbaycan Respublikası Mədəniyyət Nazirliyi tərəfindən təşkil olunmuşdur.

Rusiyanın Azərbaycandakı səfiri M. N. Evdokimov tamaşaçıların qarşısında salamlama nitqi ilə çıxış edib. Bayram gecəsi K. Əfəndiyevanın rəhbərliyi altında Bakı şəhəri Ali-Mələk Mikayıl kilsəsi xorunun ifasında Azərbaycanın və Rusiyanın himnlərinin ifası ilə başlandı.

Konsertdə bir sıra ölkələrin: Belarus, Çin, Serbiya, Tacikistan, Özbəkistan səfirliklərinin nümayəndələri, Rusiya səfirliyinin əməkdaşları, incəsənət xadimləri, ziyalılar, Bakı və Azərbaycan yeparxiyasının nümayəndələri, təhsil müəssisələrinin əməkdaşları, media və digərləri iştirak ediblər.