Bakıda Bibliya Günü qeyd olunub

Azərbaycan Bibliya Cəmiyyəti Beynəlxalq Bibliya Gününə həsr olunmuş bayram gecəsi təşkil edib. Paytaxt sakinləri üçün artıq ənənəvi hal alan tədbir Orqan və Kamera Musiqisi zalında keçirilib. Bayram gecəsinin əvvəlində Bibliyaya və onun insan həyatındakı əhəmiyyətinə həsr olunmuş sənədli film nümayiş etdirilib. Tədbirdə Mənəvi Dəyərlərin Təbliği Fondunun icraçı direktoru Mehman İsmayılov, Azərbaycan Respublikası Dini Qurumlarla İş üzrə Dövlət Komitəsinin və Bakı Beynəlxalq Multikulturalizm Mərkəzinin nümayəndələri, ölkənin xristian icmalarının rəhbərləri və nümayəndələri çıxış ediblər. Sonra “Müqəddəs Kitaba səyahət” tamaşası toplaşanların diqqətinə təqdim olundu. Bibliya Gününün qeyd olunması çərçivəsində Azərbaycan Bibliya Cəmiyyətinin baş direktoru tərəfindən Alban-Udi Xristian dini icmasının sədri R.Mobiliyə udi dilində Zəbur kitabı hədiyyə olaraq təqdim olundu. 

Bakı və Azərbaycan yeparxiyasını tədbirdə Yeparxiyanın ictimai təşkilatlarla qarşılıqlı əlaqələr şöbəsinin rəhbəri protoiyerey Mefodiy Əfəndiyev və Bakı Yeparxiyasının mətbuat katibi, protoiyerey Konstantin Pominov təmsil edib. Konstantin ata  tədbir iştirakçılarına salamlama nitqi ilə müraciət edib. 

K.V. Əfəndiyevanın rəhbərliyi altında Bakı şəhəri Ali-Mələk Mikayıl  kilsəsinin  xoru ifasında kilsə ilahiləri səsləndi.