Gəncədə “Ulu Öndər və milli-mənəvi dəyərlərimiz” mövzusunda konfrans keçirilib

Dekabrın 5-də Gəncə İmamzadə məscidi kompleksində “Ulu Öndər və milli-mənəvi dəyərlərimiz” mövzusunda konfrans keçirilib. Tədbir Qafqaz Müsəlmanları İdarəsinin Gəncə regional bölməsi tərəfindən “Heydər Əliyev ili” çərçivəsində təşkil olunub.

Forumda Gəncə şəhər İcra Hakimiyyətinin başçısı N.Bayramov, Samux Rayon İcra Hakimiyyətinin başçısı F.Əliyev, Gəncə Dövlət Universitetinin rektoru Y.Yusibov, eləcə də administrasiya nümayəndələri, siyasi və ictimai təşkilatların nümayəndələri, İkinci Qarabağ müharibəsi veteranları, bölgənin dini icmalarının rəhbərləri və nümayəndələri iştirak ediblər. 

Tədbir başlamazdan əvvəl tədbir iştirakçıları ümummilli lider Heydər Əliyevin və Azərbaycanın ərazi bütövlüyü uğrunda şəhid olanların xatirəsini bir dəqiqəlik sükutla yad ediblər. Sonra  QMİ tərəfindən hazırlanmış “Ulu Öndər və milli-mənəvi dəyərlər” filmi nümayiş etdirilib. Konfransı Şeyxülislamın Gəncə bölgəsi üzrə nümayəndəsi Tahir Abbasov açaraq ümummilli lider Heydər Əliyevin Azərbaycan dövlətçiliyinin quruculuğunda və dinlərarası münasibətlərin unikal modelinin formalaşmasında rolu haqqında məruzəsi ilə çıxış edib.

Məruzə ilə həmçinin, Gəncə şəhəri Müqəddəs Mömin Knyaz Aleksandr Nevskiy kilsəsinin baş keşişi Varfolomey Sotnikov çıxış edib.