Sumqayıtda “Heydər Əliyev və milli-mənəvi dəyərlərimiz” mövzusunda konfrans keçirilib

Dekabrın 5-də Qafqaz Müsəlmanları İdarəsinin Sumqayıt regional bölməsinin təşkilatçılığı ilə “Heydər Əliyev və milli-mənəvi dəyərlərimiz” mövzusunda konfrans keçirilib.

Konfransda Sumqayıt Şəhər İcra Hakimiyyəti başçısının müavini T.Səmədov, Qubadlı Rayon İcra Hakimiyyəti başçısının müavini A.Xaxverdiyev, Dini Qurumlarla İş üzrə Dövlət Komitəsinin Sumqayıt bölgəsi üzrə şöbəsinin müdiri Y.Abdulla, ictimaiyyət nümayəndələri, ziyalılar, ağsaqqallar, Qarabağ müharibələrində şəhid olanların ailələri, veteranlar və dini icmaların nümayəndələri iştirak ediblər.

Tədbir başlamazdan əvvəl tədbir iştirakçıları ümummilli lider Heydər Əliyevin və Azərbaycanın ərazi bütövlüyü uğrunda şəhid olanların xatirəsini bir dəqiqəlik sükutla yad ediblər. Sonra QMİ tərəfindən hazırlanmış “Ulu Öndər və milli-mənəvi dəyərlər” filmi nümayiş etdirilib. Tədbiri giriş sözü ilə açan Rauf Sərdarov Heydər Əliyevin Azərbaycan dövlətçilik tarixindəki rolundan, dini dəyərlərin qorunması və inkişafı sahəsində genişmiqyaslı fəaliyyətindən və gördüyü işlərdən danışıb.

Tədbirdə Bakı yeparxiyasını Sumqayıt şəhəri Müqəddəs Sarovlu Serafim pravoslav prixodunun baş keşişi Rostislav Şahvələdov təmsil edib və konfransın mövzusu ilə bağlı çıxış edib.