Yepiskop Aleksiy ilə Dini Qurumlarla İş üzrə Dövlət Komitəsinin sədri arasında görüş keçirilib

Bakı və Azərbaycan yepiskopu Aleksiy ilə Azərbaycan Respublikasının Dini Qurumlarla İş üzrə Dövlət Komitəsinin sədri Ramin Məmmədov arasında görüş keçirilib.

Azərbaycan Respublikası Dini Qurumlarla İş üzrə Dövlət Komitəsinin sədri Ramin Məmmədov Müqəddəs Mürr-Daşıyan Zənənlər kafedral kilsəsini ziyarət edib. Kafedral kilsəsində Dövlət Komitəsinin rəhbərini Bakı və Azərbaycan yepiskopu Aleksiy qarşılayıb. R.Məmmədov ölkənin baş pravoslav kilsəsinin tarixi və hazırkı vəziyyəti ilə tanış oldu, 2003-cü ildə onun təntənəli açılışında iştirak etdiyini bildirdi və Yeparxiya muzeyinin sərgisinə baxış keçirdi.

Bakı Yeparxiyasının Pravoslav Dini-Mədəni Mərkəzinin kitabxanasında davam edilən görüşdə Dövlət Komitəsinin sədri dövlətin dini və milli siyasətindən, multikulturalizmin Azərbaycan modelindən danışıb, pravoslav xristianların, digər dinlərin nümayəndələri ilə yanaşı, Azərbaycan cəmiyyətinin həyatının bütün sahələrində fəal iştirak etdiyini vurğulayıb. R.Məmmədov ölkənin ərazi bütövlüyünün bərpası uğrunda canlarından keçmiş Azərbaycanın Milli Qəhrəmanları arasında pravoslav xristianların da olduğunu xüsusi qeyd edib. Yepiskop Aleksiy öz növbəsində Azərbaycana gəlişindən bəri müşahidə etdiyi ənənəvi dinlərin nümayəndələri arasında dinlərarası dialoqun və səmimi dostluğun yüksək səviyyədə olduğunu qeyd edib. Yepiskop ziyarətə görə Ramin Məmmədova təşəkkür edib və Azərbaycan xalqının rifahı naminə xidmət etməyə hazır olduğunu bildirib. Dövlət Komitəsi ilə Bakı Yeparxiyası arasında qarşılıqlı fəaliyyət məsələləri də müzakirə edilib və gələcək əməkdaşlığın perspektivləri müəyyən edilib.