Yepiskop Aleksiy Azərbaycanın qərb bölgələrinə tanışlıq səfəri edib

Azərbaycanın xristian irsi ilə tanışlıq çərçivəsində yepiskop Aleksiy ölkənin qərb bölgəsinə tanışlıq səfəri edib. 

Arxiyerey Şəki rayonunun Kiş kəndində qədim Qafqaz Albaniya torpağına xristianlığın ilk toxumlarını gətirmiş, həvari Taddayın şagirdi müqəddəs Elişanın müjdəçiliyi yerində tikilmiş kilsə-muzeyini ziyarət edib. Aleksiy həzrətləri Qax rayonunun Qum kəndində V-VI əsrlərə - Qafqaz Albaniyasında xristianlığın intibah dövrünə aid qədim xristian bazilikasında olub. Oğuz şəhərində yepiskop 1822-ci ildə tikilmiş, hazırda tarix və etnoqrafiya muzeyinin yerləşdiyi müqəddəs mömin böyük knyaz Aleksandr Nevskiy pravoslav kilsəsini, eləcə də keçmiş müqəddəs Elişa monastırının "Kala Gergets" adlı kiçik kilsəsini ziyarət edib. Azərbaycan Respublikası Dini Qurumlarla İş üzrə Dövlət Komitəsinin əməkdaşları kilsələri ziyarət etməyə köməklik göstəriblər.

Səfər çərçivəsində yepiskop Aleksiy udi xalqının yığcam məskunlaşdığı Qəbələ rayonunun Nic kəndində olub, burada Alban-Udi Xristian icmasının sədri Robert Mobili və  icmanın ruhani rəhbəri Rafiq Danakari ilə görüşüb. Robert Mobili qonaqlara icmanın həyatı haqqında məlumat verib, Müqəddəs Elişa (“Cotari”) və Allahın Əqdəs Validəsi (“Bulun”) qədim kilsələrini göstərib. 

Səfər zamanı yepiskopu Bakı Yeparxiya İdarəsinin katibi protoiyerey Dionisiy Sveçnikov və iqumen Kirill (Nikitin) müşayiət ediblər.