Bakı şəhəri Ali-Mələk Mikayıl kilsəsində taxt-tac bayramı qeyd edilib

Allahın Ordularının Sərkərdəsi Müqəddəs Ali-Mələk Mikayıl və Cisimsiz Səmavi Qüvvələrin şərəfinə keçirilən bayram Bakı və Azərbaycan yeparxiyasının ən qədim kilsəsinin taxt-tac bayramıdır. Kilsənin tarixi XIX əsrin ortalarında Bakıda Xəzər Donanması heyətinin yerləşməsi ilə bağlıdır. 1845-ci ildə 45-ci donanma heyətinin xəstəxanasında inşa edilən kilsə əvvəlcə Müqəddəs Məryəmin Göylərə Götürülməsinə həsr olunmuşdu. 1873-cü ildə Xəzər Donanmasının heyəti üçün Bakı limanında müqəddəs Moskvalı Aleksiy kilsəsinin tikintisi və köhnə Məryəmin Göylərə Götürülməsi kilsəsinin ləğvi ilə əlaqədar olaraq, köhnə «dəniz» kilsəsinin binası 66-cı Bakı quberniya batalyonunun (sonralar Salyan alayına çevrildi) tabeliyinə verildi. Beləliklə, köhnə dəniz kilsəsi batalyon kilsəsinə, daha sonra isə alay kilsəsinə çevrildi. Batalyon kilsəsinin taxt-tac bayramı Ali-Mələk Mikayıl bayramı gününə düşdü. 1891-1892-ci illərdə köhnəlmiş kilsə binası bərpa və rekonstruksiya edildi və 1 noyabr 1892-ci il tarixində Ali-Mələk Mikayılın şərəfinə təqdis olundu. Şəhərin bir çox sakinləri tərəfindən sevilən Ali-Mələk kilsəsinin tarixi budur. Kilsəni hələ də köhnə adətə görə «dəniz» kilsəsi adlandırırlar.

Taxt-tac bayramı ibadətlərinə Bakı və Azərbaycan yepiskopu Aleksiy başçılıq edib. Arxiyereyi yeparxiyanın ruhaniləri müşayiət ediblər. İlahi Liturgiyanın sonunda xaç yürüşü keçirildi və uzun illər duaları oxundu. Daha sonra uşaq bazar günü məktəbinin şagirdləri bayrama həsr olunmuş şeirlər və ilahilər ilə mərasim iştirakçılarını təbrik etdi. Yepiskop Aleksiy həzrətləri uşaqlara könül oxşayan çıxışlarına görə təşəkkür etdi və kilsədə toplaşanlara bayram mövzusunda moizə ilə müraciət etdi. Daha sonra kilsənin həyətinə toplaşanların hamısı bayram süfrəsinə dəvət edildi.