Yepiskop Aleksiy Şarjada kilsə taxt-tac bayramının qeyd edilməsinə başçılıq edib

Noyabrın 27-də Kilsə müqəddəs həvari Filipin xatirəsini yad edir. Həmin gün Ərəbistan yarımadasında ilk və yeganə pravoslav kilsəsi olan Şarja şəhəri (BƏƏ) həvari  Filip kilsəsində taxt-tac bayramı qeyd edilib. Moskva və Bütün Rusiyanın Patriarxı Kirillin xeyir-duası ilə bayram İlahi Liturgiyasına Bakı və Azərbaycan yepiskopu Aleksiy başçılıq edib. İbadət zamanı arxiyereyi həvari Filip kilsəsinin baş keşişi arximandrit Aleksandr (Zarkeşev), Bakı Yeparxiya İdarəsinin katibi, protoiyerey Dionisiy Sveçnikov, keşiş Konstantin Orlov, protodiakon Konstantin Markoviç və diakon Aleksiy Kostin müşayiət ediblər. İbadət ilahilərini prixod xoru ifa edib.  

İncilin oxunuşundan sonra arxiyerey ibadətdə iştirak edənlərə bayram mövzusunda moizə ilə müraciət edib. Liturgiyanın sonunda arximandrit Aleksandr yepiskop Aleksini altarın qarşısında səmimiyyətlə salamlayıb. Arxipastır kilsənin baş keşişi, kilsə ruhaniləri və prixodun imanlılarını taxt-tac bayramı münasibətilə təbrik etdi.