Kilsə xoru A.Şnitkenin 90 illik yubileyinə həsr olunmuş konsertdə iştirak edib

Bakı Rus Evində görkəmli sovet və rus bəstəkarının anadan olmasının 90 illiyinə həsr olunmuş “Alfred Şnitkenin səs labirintləri” adlı konsert keçirilib. Tədbir A. Şnitke adına Moskva Dövlət Musiqi İnstitutunun dəstəyi ilə Bakı Rus Evi, Rusiya Milli Musiqi Muzeyi və Ü.Hacıbəyli adına Bakı Musiqi Akademiyasının birgə təşkilatçılığı ilə keçirilib. 

Musiqili gecə başlamazdan əvvəl tamaşaçıları Bakı Rus Evinin rəhbəri İrek Zinnurov salamlayıb. Rusiya Milli Musiqi Muzeyinin baş direktoru M.A. Brızqalov muzeyin çoxşaxəli fəaliyyətindən, unikal eksponat kolleksiyasından və A.Şnitkenin yubileyinə həsr olunmuş həyata keçirilən layihələrdən danışıb.

Konsert proqramında Azərbaycanın xalq artisti Ülviyyə Hacıbəyova, Azərbaycan Dövlət Akademik Musiqili Teatrının və Azərbaycan Dövlət Simfonik Orkestrinin solistləri, Bakı Musiqi Akademiyasının müəllimləri iştirak ediblər. Rus Evinin dəvəti və Aleksiy həzrətlərinin xeyir-duası ilə Bakı Ali-Mələk Mikayıl kilsəsinin xoru musiqili gecədə iştirak edib.

Görkəmli bəstəkarın yubileyinin qeyd olunması çərçivəsində Bakı Rus Evinin dəstəyi ilə Rusiya Milli Musiqi Muzeyi tərəfindən hazırlanmış sərgi təşkil olunub. Eksponatlara A.Şnitkenin musiqi əlyazmaları və şəxsi əşyaları, arxiv fotoşəkilləri, həmçinin bəstəkarın musiqisinin səsləndirildiyi məşhur filmlərdən kadrlar daxil edilib.