Bakıda yeni katolik kilsəsinin təməli qoyuldu

Azərbaycanın paytaxtında yeni katolik kilsəsinin təməlqoyma mərasimi keçirilib. Məbədin tikintisi üçün torpaq sahəsinin təqdis olunması və II İoann Pavelə həsr olunacaq  yeni məbədin təməl daşının qoyulması mərasiminə Müqəddəs Taxt-Tacın dövlətlər və beynəlxalq təşkilatlarla əlaqələr üzrə katibi, arxiyepiskop Paul Qallaher başçılıq edib. Mərasimdə həmçinin Müqəddəs Taxt-Tacın Azərbaycandakı apostol nunsisi, arxiyepiskop Marek Solçinski, Azərbaycanda Apostol Prefekturasının  başçısı,  yepiskop Vladimir Fekete, Azərbaycan Respublikasının Dini Qurumlarla İş üzrə Dövlət Komitəsinin sədri Ramin Məmmədov, Azərbaycan Respublikasının Müqəddəs Taxt-Tacdakı fövqəladə və səlahiyyətli səfiri İlqar Muxtarov, katolik icmasının üzvləri, KİV nümayəndələri iştirak ediblər. Tədbirdə yepiskop Vladimir Feketenin dəvəti ilə Bakı və Azərbaycan yepiskopu Aleksiy iştirak etmişdir.