Bakıda “Azərbaycanda xristianlıq: tarix, müasir dövr, perspektivlər” mövzusunda dəyirmi masa keçirilib

Bakı Beynəlxalq Multikulturalizm Mərkəzində “Azərbaycanda xristianlıq: tarix, müasir dövr, perspektivlər” mövzusunda dəyirmi masa keçirilib. Xristianlıq Azərbaycanda qədim tarixə malikdir. İndiki Azərbaycan ərazisinin əhəmiyyətli hissəsini tutan dövlət olan Qafqaz Albaniyasında xristianlığın yayılmasının ilkin dövrü Rəbb İsa Məsihin şagirdləri, həvarilər Varfolomey və Faddeyin, habelə həvari Faddeyin şagirdi müqəddəs Elişanın fəaliyyəti ilə bağlıdır. İki min il ərzində bərəkətli Azərbaycan torpağı burada digər dini konfessiyaların nümayəndələri ilə sülh və harmoniya şəraitində yaşayan bir çox xristian nəsillərinin vətəninə çevrilib. Bu gün Azərbaycanda xristianları Rus Pravoslav Kilsəsinin Bakı və Azərbaycan Yeparxiyası, Katolik Kilsəsinin Apostol Prefekturası, Alban-Udi xristian icması, molokan icması və bir sıra protestant icmaları tərəfindən təmsil edilir.

“Azərbaycanda xristianlıq: tarix, müasir dövr, perspektivlər” mövzusunda keçirilən dəyirmi masanın təşəbbüskarı kimi Bakı və Azərbaycan Yeparxiyası, ölkənin digər xristian icmaları ilə əməkdaşlıqda, çıxış edib. Tədbirdən əvvəl toplaşanlara Azərbaycandakı xristian icmalarının həyatına həsr olunmuş tematik fotosərgi nümayiş etdirilib. Dəyirmi masa Azərbaycan Respublikasının himninin səsləndirilməsi ilə açılıb.

Açılış nitqi ilə çıxış edən Bakı və Azərbaycan yepiskopu Aleksiy tədbirin Bakı Beynəlxalq Multikulturalizm Mərkəzində keçirilməsi imkanına görə Mərkəzin icraçı direktoru Rəvan Həsənova təşəkkür edib. Rəvan Həsənov öz növbəsində qeyd edib ki, xristian icmaları ilə əməkdaşlıq, onların mədəniyyətinin və dini irsinin öyrənilməsi, eləcə də beynəlxalq səviyyədə təmsil olunması BBMM-in fəaliyyətinin mühüm tərkib hissəsidir. Dəyirmi masa iştirakçılarını Qafqaz Müsəlmanları İdarəsi sədrinin müavini Fuad Nurullayev, Bakı Dağ Yəhudiləri Dini İcmasının sədri Milix Yevdayev və Katolik Kilsəsinin Azərbaycandakı Apostol Prefekturasının general-vikarisi Yozef Marek salamlayıblar. Məruzələri Bakı və Azərbaycan yepiskopu Aleksiy, Alban-Udi Xristian İcmasının sədri Robert Mobili, Katolik Kilsəsinin Azərbaycandakı Apostol Prefekturasının mətbuat katibi Toral Ağayev, Azərbaycan Bib Cəmiyyətinin sədri Rasim Xəlilov və Azərbaycan Yevangelist Lüteran İcmasının nümayəndəsi Vera Nesterova təqdim etmişlər. Dəyirmi masa iştirakçılarına Azərbaycanda pravoslav kilsələrinin tarixindən və Azərbaycan Bibliya Cəmiyyətinin fəaliyyətindən bəhs edən videoçarxlar təqdim olunub. Tədbirin sonunda yekun sənəd qəbul edilib.