Bakı kilsə xoru beynəlxalq musiqi layihəsində iştirak edib

Bakı şəhəri Müqəddəs Ali-Mələk Mikayıl kilsəsinin xoru beynəlxalq musiqi layihəsi olan - “İbrahim” oratoriyasının dünya premyerasında iştirak edib. Məşhur İsrail bəstəkarı Barux Berlinerin eyniadlı simfonik poeması əsasında yazılmış qiraətçi, xor, orqan və simfonik orkestr üçün oratoriyanın premyerası Moskvada, Müqəddəs Məryəm roma katolik kafedral kilsəsində Pasxa festivalının bağlanışı çərçivəsində baş tutub. Bakının ən qədim kilsəsinin xor kollektivinin layihədə iştirakı Azərbaycan Respublikasının Birinci vitse-prezidenti Mehriban Əliyevanın və onun rəhbərlik etdiyi Heydər Əliyev Fondunun dəstəyi sayəsində mümkün olub.

Musiqi əsəri Mendeleyev adına Xor Konqresinin Akademik birgə xoru tərəfindən ifa olunub, o cümlədən: D.İ.Mendeleyev adına RKTU-nin Akademik böyük xoru, Moskva Metropoliteni Akademik xoru, Rusiyanın əməkdar artisti Olqa Serebriyskayanın rəhbərliyi ilə Orenburq Kamera xoru, Rusiyanın əməkdar artisti Qalina Koltsovanın rəhbərliyi altında "Blaqovest" adlı Moskva ruhani musiqisi üzrə xor ansamblı, Lyubov Kamenskayanın rəhbərliyi altında Puşkin adına Musiqi Kollecinin kamera xoru, Birləşmiş Xor Hərəkatının əməkdar xadimi Kristina Əfəndiyevanın rəhbərliyi altında Bakı Ali-Mələk Mikayıl kilsəsinin xoru, bədii rəhbəri Eldar Abasov olan Kosıqin adına Rusiya Dövlət Universitetinin “Debüt” oğlan və gənclər xoru. Birləşdirilmiş xor və simfonik orkestrə layihənin baş xormeysteri və ikinci dirijoru Boris Tarakanov və Aleksey Mezin dirijorluq etmişlər. Azərbaycan, Rusiya və İsrail musiqiçilərini bir araya gətirən layihənin prodüseri israilli bəstəkar Barux Berlinerin nümayəndəsi, “Baruch Berliner’s Genesis International Project” beynəlxalq şirkətinin rəhbəri Naum Slutsker olub. Oratoriyanın premyera nümayişindən sonra cənab N. Slutsker toplaşmış auditoriya qarşısında salamlama nitqi ilə çıxış etdi və o, layihənin bütün iştirakçılarına göstərdikləri səylərə görə təşəkkür etdi, dost Azərbaycandan gələn qonaqları – Müqəddəs Ali-Mələk Mikayıl kilsəsinin xorunu xüsusi vurğuladı.