Nic qəsəbəsinin udi kilsəsində İlahi Liturgiya

İki ildən artıqdır ki, alban-udi xristian icmasında liturgik həyat davam etdirilir. İcma rəhbərliyi ilə razılığa əsasən Bakı Yeparxiyasının ruhaniləri pravoslav udilərlə birlikdə ildə bir neçə dəfə Azərbaycanın Qəbələ rayonu Nic qəsəbəsinin Müqəddəs Elişa (“Jotari”) və Allahın Əqdəs Validəsi “Bulun” qədim kilsələrində İlahi Liturgiya ibadətini keçirirlər. 

Şənbə günü, martın 9-da Allahın Əqdəs Validəsi (“Bulun”) kilsəsində keçirilən ibadətə Bakı Yeparxiyasının katibi arximandrit Aleksiy (Nikonorov), protodiakon Vadim Tokarevin müşayiəti ilə başçılıq edib. Liturgiya zamanı ilahilər Mixail Klimovun rəhbərliyi altında mqd. Mürr-Daşıyan Zənənlər kafedral kilsəsinin kiçik xoru tərəfindən ifa edilib. Dualar və İncil həm kilsə-slavyan, həm də udi dillərində səslənib. İbadətə təkcə kəndin pravoslav sakinləri deyil, həm də Yeparxiyanın zəvvarlıq şöbəsi tərəfindən Nic qəsəbəsinə təşkil olunan səfərdə iştirak edən Bakıdan zəvvarlar da qatılıblar. Səfər çərçivəsində CBC tele-şirkətinin “Tolerantlığın çalarları” silsiləsinin növbəti buraxılışı çəkilib.

İbadətin sonunda arximandrit Aleksiy Alban-Udi icmasının dini rəhbəri Rafik (Rafael) Danakariyə udilərin Nic qəsəbəsinin qədim xristian ziyarətgahlarını ziyarət edən bütün zəvvarlara göstərdikləri səmimi qonaqpərvərliyə görə təşəkkürünü bildirib.