Bakı kilsə xoru XIV Beynəlxalq “Kirill və Mefodiy” xor müsabiqəsində iştirak edib

3 may tarixində Moskva şəhəri Xilaskar Məsih kafedral kilsəsinin Kilsə Məclisləri Zalında XIV Beynəlxalq “Kirill və Mefodiy” xor müsabiqəsinin qala-konserti və qaliblərin mükafatlandırılması mərasimi keçirilib.

Təntənəli tədbiri Moskva və bütün Rusiya Patriarxı yanında rus kilsə ifaçılığın inkişafı üzrə kilsə-ictimai Şurasının katibi Varvara Volkova və P. İ. Çaykovski adına Moskva Dövlət Konservatoriyasının professoru, müsabiqənin bədii rəhbəri Aleksey Mixayloviç Rudnevskiy açdılar.

Daha sonra müvafiq nominasiyalar üzrə qalib olmuş xor kollektivlərinin iştirakı ilə konsert proqramı təqdim olunub və tədbir iştirakçıları mükafatlandırılıb. Tədbirin sonunda müsabiqə qaliblərinin birləşmiş xoru müqəddəs həvarilərə bərabər qardaşlar Kirill və Mefodinin şərəfinə himn ifa edib.

Bakı və Azərbaycan yepiskopu Aleksiy həzrətlərinin xeyir-duası ilə mükafatlandırma mərasimində Bakı şəhəri Müqəddəs Ali-Ali-Mələk Mikayıl kilsəsinin baş keşişi protoiyerey Mefodiy Əfəndiyev və xorun regenti Kristina Əfəndiyeva iştirak ediblər.

Cari ilin fevral–aprel aylarında Moskva şəhərində əyani və distant (video yazılar əsasında) formatlarda keçirilmiş müsabiqənin yekunlarına əsasən, Bakı şəhəri Müqəddəs Ali-Mələk Mikayıl kilsəsinin xoru “Həvəskar xorlar, mədəniyyət evləri nəzdində fəaliyyət göstərən xorlar, həvəskar kilsə xorları” nominasiyası üzrə III dərəcəli gümüş diploma, “A cappella ruhani musiqi” nominasiyası üzrə isə I dərəcəli bürünc diploma layiq görülüb.

Müsabiqənin təşkilatçıları Moskva və bütün Rusiyanın Patriarxı yanında rus kilsə nəğməçiliyinin inkişafı üzrə Kilsə-İctimai Şurası, Solntsevodakı Müqəddəs Radonejli Sergi məbədi və Yeloxovodakı Epifaniya Kafedral Soboru olub. Ümumilikdə müsabiqə dinləmələrində Rusiya, Azərbaycan, Qazaxıstan, Belarus və Avstraliyadan 56 xor kollektivi iştirak edib.