Azərbaycanın dini icmalarının rəhbərləri Ümumdünya Şəhərsalma Forumunun açılışında iştirak ediblər

Bakıda şəhərsalma və urbanizasiya məsələlərinə həsr olunmuş böyük beynəlxalq tədbir —  Ümumdünya Şəhərsalma Forumunun XIII sessiyası (WUF13) öz işinə başlayıb. Ümumdünya Şəhərlərsalma Forumu 2001-ci ildə Birləşmiş Millətlər Təşkilatı tərəfindən təsis olunub. Forumun əsas məqsədi sürətli urbanizasiya proseslərini və onların iqtisadiyyata, iqlimə və cəmiyyətə təsirini araşdırmaqdır. İlk forum 2002-ci ildə Keniyanın paytaxtı Nayrobi şəhərində keçirilib və təxminən 1200 iştirakçını bir araya gətirib. Bakıda keçirilən XIII forum iştirakçı sayına görə rekord göstərici ilə yadda qalıb. Forumun işində dünyanın 182 ölkəsindən 40 mindən çox nümayəndə iştirak edir. İştirakçılar arasında dövlət və hökumət başçıları, aidiyyəti nazirlər, 120 şəhərin meri, beynəlxalq təşkilatların və BMT agentliklərinin nümayəndələri, memarlar, alimlər, özəl sektorun və maliyyə institutlarının təmsilçiləri yer alırlar. Forumun açılış mərasimində Azərbaycanın dini icmalarının rəhbərləri də iştirak ediblər.