Pravoslav gənclər Nic qəsəbəsinin kilsələrini ziyarət ediblər

Bakı və Azərbaycan yepiskopu Aleksinin xeyir-duası ilə pravoslav gənclər üçün Nic qəsəbəsinə ziyarət səfəri təşkil olunub. Nicdə yerləşən Allahın Əqdəs Validəsi («Bulun») kilsəsində Müqəddəs Məryəmin şərəfinə akafistlə müşayiət olunan dua mərasimi keçirilib. Akafist mətnləri kilsə slavyan və Azərbaycan dillərində oxunub. Səfər zamanı gəncləri Bakı Yeparxiyasının Gənclər şöbəsinin rəhbəri protoiyerey Dionisiy Sveçnikov və Bakı şəhəri Müqəddəs Mürr-Daşıyan Zənənlər kafedral kilsəsinin  ruhanisi protodiakon Vadim Tokarev müşayiət ediblər.

Səfər çərçivəsində gənclər Qəbələ rayonunun xristian və tarixi irsi ilə tanış olub, Nic qəsəbəsindəki kilsələri ziyarət edib, burada kompakt şəkildə yaşayan udi xalqının nümayəndələri ilə görüşüblər. Onlar həmçinin Qəbələ Tarix-Arxeologiya Qoruğunu ziyarət edib və qədim xristian məbədinin qalıqlarını görmək üçün Kilsədağ dağına qalxıblar.

Səfər xeyriyyəçilərin dəstəyi ilə Bakı Yeparxiyasının zəvvarlıq üzrə şöbəsi tərəfindən təşkil olunub.