Bakı Yeparxiyasında şəhid-keşiş İoann Qançevin xatirəsi qeyd edilib

Noyabrın 2-də Kilsə müqəddəs şəhid İoann Qançevin xatirəsini yad edir. Gələcəkdə keşiş İoann olacaq İvan Qanmev 1878-ci ildə Vladimir vilayətinin Sina kəndində anadan olub. İvan Qançev ruhani təhsili Petroqrad İlahiyyat Seminariyasında alıb və 1910-cu ildə oranı bitirdikdən sonra keşişliyi qəbul edib. Sonra ruhani rəyasətin xeyir-duası ilə uzaq Azərbaycanda keşişlik etməyə getmiş, burada Bakı quberniyasının Quba rayonunun Aleksandrovka kəndində Allahın Əqdəs Validəsinin "Boqolyubskaya" ikonasının şərəfinə kilsənin baş keşişi, Bakı şəhəri Allahın Əqdəs Validəsinin Mövludu kilsəsinin baş keşişi və Lənkəran şəhərinin yaxınlığında yerləşən Prişıb kəndinin Allahın Əqdəs Validəsinin "Bütün kədərlilərin sevinci" ikonasının şərəfinə kilsənin baş keşişi vəzifələrində xidmət etmişdir. 1933-cü ildə ata İoann əksinqilabi və cəsusluq fəaliyyət haqda saxta ittihamlarla həbs edilir və Qazaxıstana sürgünə göndərilir. Sürgündən qayıdarkən yenidən həbs edilir və 1937-ci il oktyabrın 31-də edama məhkum edilir.  Hökm noyabrın 2-də icra olundu.  

2000-ci ildə Rus Pravoslav Kilsəsinin Yepiskoplarının Yubiley Şurasında keşiş İoann İlyiç Qançev Rus Kilsəsinin XX əsrdə Yeni Şəhidləri və İqrarçıları içində müqəddəs elan olundu. Bakı yeparxiyasında müqəddəs şəhidin xatirəsi ənənəvi olaraq noyabrın 2-nə ən yaxın bazar günü qeyd edilir. 

Bayram günü Müqəddəs Mürr-Daşıyan Zənənlər kafedral kilsəsində keçirilən İlahi Liturgiyaya Bakı və Azərbaycan yepiskopu Aleksiy başçılıq edib. Arxiyereyi kafedral kilsəsinin ruhaniləri müşayiət ediblər. İbadətin sonunda yepiskop Aleksiy həzrətləri toplaşanlara Bakı presviteri, şəhid İoannın həyatı və göstərdiyi şücaəti  mövzusunda xütbə ilə müraciət etdi.