Bakı kilsə xoru Moskva Pasxa festivalında iştirak edib

Mayın 9-dan 11-dək Bakı və Azərbaycan Yeparxiyasının rəhbəri vəzifəsini müvəqqəti icra edən Pyatiqorsk və Çərkəz arxiyepiskopu Feofilakt həzrətlərinin xeyir-duası ilə Bakı şəhəri Ali-Mələk Mikayıl kilsəsinin xoru Moskvada keçirilən “Pasxa hədiyyəsi” xeyriyyə festivalında iştirak edib.

Paytaxtın Mədəniyyət departamenti və Moskva kütləvi tədbirlər idarəsi tərəfindən hər il təşkil olunan xeyriyyə festivalı Moskva və bütün Rusiya Patriarxı Kirillin xeyir-duası və Moskva meri S.S. Sobyaninin təşəbbüsü ilə Məsihin Mübarək Dirilməsi bayramının qeyd olunduğu günlərdə keçirilir. Festival müxtəlif ölkələrin və regionların xalqları və nümayəndələri arasında xoş münasibətlərin inkişafını təşviq etmək üçün keçirilir.

Mayın 10-da Birləşmiş Xor Hərəkatının əməkdar xadimi Kristina Əfəndiyevanın rəhbərliyi ilə Bakı şəhəri Ali-Mələk Mikayıl kilsəsinin xoru Tsaritsıno Muzey-Qoruğunun ərazisində, festivalın mərkəzi meydançalarından biri olan Allahın Validəsinin "Həyatgətirən Bulaq" ikonasının şərəfinə ucaldılmış kilsənin yaxınlığında konsert proqramı ilə çıxış edib. Tədbirdə iştirak edənlərə ikihissəli konsert proqramı təqdim olunub. Birinci blok Pasxa dövrünə aid musiqi əsərlərindən ibarət idi. Əsərlərin ikinci bloku Böyük Vətən Müharibəsində Qələbənin 79-cu ildönümünün qeyd edilməsinə həsr olunmuşdur. Musiqi əsərlərini Azərbaycan dilində ifa edən solistləri festivalın qonaqları xüsusi hərarət və maraqla qarşıladılar.

Xorun konsert proqramının aparıcısı, Bakı Musiqi Akademiyasının baş müəllimi Alyona İnyakina tamaşaçılara Azərbaycanın və Azərbaycan xalqının Böyük Vətən Müharibəsində Qələbəyə verdiyi töhfələrdən, Bakı neftinin cəbhə üçün həlledici əhəmiyyətindən danışıb. Vətənin qəhrəman müdafiəçilərinin xatirəsinin qorunub saxlanılması məsələsinə Azərbaycan xalqının ümummilli lideri Heydər Əliyevin və Azərbaycan Respublikasının Prezidenti İlham Əliyevin ehtiramlı münasibəti də xüsusi vurğulanıb.

Mayın 11-də Moskva səfəri çərçivəsində xor kollektivi məşhur "VDNX" sərgi kompleksində olub və orada Azərbaycan pavilyonunu ziyarət edib. Pavilyonun rəhbərliyi qonaqlar üçün ekskursiya təşkil edib, ekskursiya zamanı ifaçılar pavilyonun yaranma və bərpası tarixi ilə tanış olublar. Vətənə məhəbbəti ifadə etmək istəyən xor pavilyonun əməkdaşları və qonaqları üçün Azərbaycan xalqının görkəmli oğlu M.Maqomayevin məşhur “Azərbaycan” mahnısını ifa etmiş və bununla tədbir iştirakçılarının böyük sevincinə və gurultulu alqışlarına səbəb olmuşdur.