Zəvvarlar kafedral kilsəsinə Müqəddəs Üçlük və Bütün Müqəddəslər ikonalarını hədiyyə ediblər

Bakı və Azərbaycan yepiskopu Aleksinin xeyir-duası ilə mayın 25-dən iyunun 1-dək Bakı Yeparxiyasının zəvvarlıq şöbəsi tərəfindən Azərbaycandan olan zəvvarların Sankt-Peterburq və Valaam adasının müqəddəs yerlərinə səfəri təşkil olunub. Zəvvarlar həmçinin Müqəddəs Məryəmin Göyə Götürülməsi şərəfinə olan Serafim-Vıritski monastırını və Müqəddəs Üçlüyün şərəfinə olan Aleksandr-Svirski monastırını da ziyarət ediblər.
Aleksandr-Svirski monastırında zəvvarlar Müqəddəs Üçlük və Bütün Müqəddəslər ikonalarını əldə ediblər. Rəbb günü İlahi Liturgiyasından sonra bu ikonalar təntənəli şəkildə Bakı şəhəri Müqəddəs Mürr-Daşıyan Zənənlər kafedral kilsəsinə hədiyyə olunub. İkonalar yepiskop Aleksiy tərəfindən ehtiramla qəbul edilib. Yepiskop zəvvarlara bu qiymətli hədiyyəyə görə təşəkkürünü bildirib və qeyd edib ki, bu müqəddəs ikonalar kilsədə layiqli yer tutacaqlar.