Bakıda Həvari Bartalmayın anma günü qeyd edilib

24 iyun tarixində, Bakı şəhərinin səmavi himayədarı müqəddəs həvari Bartalmayın xatirəsi günündə Qız Qalasının yaxınlığında müqəddəsin şərəfinə akafistin oxunuşi ilə müşayiət olunan dua mərasimi keçirilib. Ənənəyə uyğun olaraq, həmin gün Azərbaycan xristianları 1892-ci ildə inşa edilmiş və 1936-cı ildə dağıdılmış Müqəddəs Bartalmay ibadətgahının təməli üzərində dua etmək üçün bir araya gəlirlər. Səhər tezdən keçirilməsinə baxmayaraq, hər il təşkil olunan bu dua mərasimi müqəddəs həvarinin şəfaətini və yardımını diləmək istəyən çoxsaylı möminləri bir araya toplayır.

Müqəddəs həvari Bartalmayın şəhid olduğu yerdə keçirilən ibadətə Bakı və Azərbaycan yepiskopu Aleksiy başçılıq edib. Dua mərasimində Azərbaycan Respublikasındakı Rusiya Federasiyasının fövqəladə və səlahiyyətli səfiri Mixail Yevdokimov, Azərbaycanda Katolik Kilsəsinin apostol prefekti yepiskop Vladimir Fekete və Alban-Udi xristian icmasının sədri Robert Mobili iştirak ediblər. Mərasimin sonunda yepiskop Aleksiy bayram ibadətinin təşkilində Bakı yeparxiyasına hərtərəfli dəstək göstərmiş “İçərişəhər” Dövlət Tarix-Memarlıq Qoruğu İdarəsinin sədri Rüfət Mahmudovu salamlayaraq ona təşəkkürünü bildirib. Bayram tədbirləri daha sonra Müqəddəs Mürr-Daşıyan Zənənlər kafedral kilsəsində İlahi Liturgiya ilə davam edib.