Yepiskop Aleksiy İvanovka kəndində yerləşən Müqəddəs Həvari və Müjdəçi Yəhya prixodunda İlahi Liturgiyaya başçılıq edib

Əllinci Gün (Pentikost) bayramından sonrakı 7-ci Rəbb günü Bakı və Azərbaycan yeparxiyasının yepiskopu Aleksiy İvanovka kəndində yerləşən Müqəddəs Həvari və Müjdəçi Yəhya prixodunda İlahi Liturgiyaya başçılıq edib. Yepiskopu Müqəddəs Mürr-Daşıyan Zənənlər kafedral kilsəsinin ruhanisi, İvanovka icmasına ruhani xidmət göstərən protoiyerey Konstantin Pominov və yeparxiyanın baş diakonu protodiakon Vadim Tokarev müşayiət ediblər. İbadət nəğmələri Şalva Abasovun rəhbərliyi ilə kafedral kilsənin xor üzvləri tərəfindən ifa olunub. İlahi Liturgiyada İvanovka pravoslav icmasının üzvləri və Bakıdan gəlmiş zəvvarlar iştirak ediblər. Zəvvarların səfəri yeparxiyanın Zəvvarlıq şöbəsi tərəfindən təşkil olunub.

Liturgiyanın sonunda yepiskop Aleksiy möminlərə arxipastır nəsihəti ilə müraciət edib. Kilsənin bazar məktəbinin şagirdləri Leyla Qurbanovanın rəhbərliyi altında bu münasibətlə xüsusi hazırlanmış şeirlər və ilahilərlə çıxış ediblər. İbadətdən sonra bütün ibadət iştirakçıları qardaşlıq süfrəsinə dəvət edildilər.